ရွေးကောက်ပွဲနိုင် NLD အမတ်လောင်းကို လိုင်စင်မဲ့ငွေချေးမှုဖြင့် ပြည်ခိုင်ဖြိုးဥက္ကဋ္ဌမှ တရားစွဲ

 ၂၀၂၀ ရွေးကောက်ပွဲ မင်းကင်းမြို့မဲဆန္ဒနယ်တွင် အနိုင်ရထားသော NLD ပါတီအမတ်လောင်းကို လိုင်စင်မဲ့ချေးငွေလုပ်ငန်း ဆောင်ရွက်သဖြင့် မြို့နယ်ပြည်ခိုင်ဖြိုးပါတီဥက္ကဋ္ဌက ဒီဇင်ဘာ ၄ ရက်တွင် တရားစွဲဆိုထားသည်။

တရားစွဲဆိုခံရသူမှာ မင်းကင်းမြို့နယ် တိုင်းဒေသကြီးလွှတ်တော်အမှတ် (၂) မဲဆန္ဒနယ်တွင် အနိုင်ရခဲ့သော NLD မှအမတ်လောင်း ဦးအောင်ထွန်းလွင် ဖြစ်သည်။

တရားစွဲဆိုသူမှာ မင်းကင်းမြို့နယ် တိုင်းဒေသကြီးလွှတ်တော်အမှတ် (၂) မဲဆန္ဒနယ်မှ လွှတ်တော်ကိုယ်စားလှယ် မြို့နယ်ပြည်ခိုင်ဖြိုးပါတီ ဥက္ကဋ္ဌ ဒေါက်တာဆန်းဝင်း ဖြစ်သည်။

၎င်းတို့နှစ်ဦးသည် ၂၀၂၀ ရွေးကောက်ပွဲတွင် တိုင်းဒေသကြီးလွှတ်တော်အမှတ် (၂) မဲဆန္ဒနယ်၌ ယှဉ်ပြိုင်ဖက်များ ဖြစ်ခဲ့ကြသည်။

ဦးအောင်ထွန်းလွင်နှင့် မင်းကင်းမြို့နယ် ဝရဲရွာနေ မောင်ဌေးဆိုသူတို့သည် လိုင်စင်(သို့) ခွင့်ပြုချက် မရှိဘဲ “တောင်တွင်းဒေသဖွံ့ဖြိုးရေးဖောင်ဒေးရှင်း ” ဟူသော အမည်ကို အသုံးပြု၍ ပြည်သူများထံမှ အကျိုးအမြတ်များယူကာ အသေးစားငွေရေးကြေးရေးလုပ်ငန်းများကို မင်းကင်းမြို့နယ်၊ တောင်တွင်းဒေသရှိ ဝရဲရွာ၊ မအူရွာ၊ မြို့မရွာများတွင် ငွေ ၁၀၀ လျှင် အတိုးနှစ်ကျပ်ခွဲနှုန်းဖြင့် ငွေချေးထားသည်ဟု တိုင်စာတွင် ဖော်ပြထားသည်။

“လတ်တလော ကျွန်တော်တို့သိထားတာတော့ ရွာ ၃ ရွာပေါ့။ လိုင်စင်မရှိဘဲ တရားမဝင်ချေးနေတာ။ ကျွန်တော်လည်း ချေးငွေလုပ်ငန်းလုပ်တယ်။ ဒါပေမဲ့ လိုင်စင်နဲ့လုပ်တာ”ဟု ဒေါက်တာဆန်းဝင်းက ပြောသည်။

တိုင်တန်းမှုကို အသေးစားငွေရေးကြေးရေးလုပ်ငန်း ဥပဒေပုဒ်မ ၅၇ ဖြင့် ရဲစခန်းမှ အမှုလက်ခံထားပြီး စစ်ကိုင်းတိုင်းငွေရေးကြေးရေးကြီးကြပ်မှုကော်မတီထံ တင်ပြမည်ဖြစ်သည်။

“ကျွန်တော် အမတ်လောင်း စလျှောက်ကတည်းက အဲဒီဖောင်ဒေးရှင်းက နှုတ်ထွက်ထားပါတယ်။ အမှုဖွင့်တာတော့ သိတယ်။ တရားဝင်အကြောင်းကြားတာ မရှိဘူး”ဟု ဦးအောင်ထွန်းလွင်က ပြောသည်။

၂၀၂၀ ရွေးကောက်ပွဲတွင် မင်းကင်းမြို့နယ်ရှိ မဲဆန္ဒနယ် အားလုံးကို NLD အမတ်အားလုံးက အနိုင်ရရှိထားသည်။