မဲရုံတာဝန်ကျ ဆရာ/ဆရာမများအပါအဝင် ပညာရေးဝန်ထမ်း ၁၀၀ ကျော် ကိုဗစ် ကူးစက်ခံထားရ၊ နှစ်ဉီး သေဆုံးခဲ့ပြီးဖြစ်

 နိုဝင်ဘာ ၈ ရက် ရွေးကောက်ပွဲ၌ မဲရုံ အသီးသီး၌ တာဝန်ယူခဲ့ကြသော ဆရာ/ဆရာမများအပါအဝင် ပညာရေးဝန်ထမ်း ၁၀၀ ကျော် ကိုဗစ် -၁၉ ရောဂါကူးစက်ခံထားရပြီး နှစ်ဦးသေဆုံးခဲ့ကြောင်း မြန်မာနိုင်ငံဆရာ/ဆရာမများအဖွဲ့ချုပ် (MTF)ထံမှ သိရသည်။

ယခု ကိုဗစ်ကူးစက်ခံရသူများ၌ ဆရာ/ဆရာမများ၊ ရုံးအဖွဲ့ဝင်များ၊ ဒုတိယ ဉီးစီးမှူး၊ ရုံးအဖွဲ့ဘက်မှ ဝန်ထမ်းများ၊ မြို့နယ်ပညာရေးမှူးရုံးအချို့မှ ဝန်ထမ်းများ၊ အကြီးတန်းစာရေးများ ပါဝင်ကြောင်း သိရသည်။

“ လူနာ ၁၀၀ ဖြစ်သွားပြီ။ နောက် နည်းနည်းလေးတောင် အစွန်းထွက် ထပ်ထွက်လာဉီးမယ်။ နောက်ထပ်စာရင်းလေးတွေ ပြန်ပြီးတိုက်စစ်နေလို့။ တချို့တွေကလည်း စာရင်းကို တစ်ယောက်ပေး၊ နှစ်ယောက်ပေး ထပ်နေတာတွေရှိတယ် ” ဟု MTF အတွင်းရေးမှူး ဒေါက်တာ ဇော်မျိုးလှိုင်က ပြောသည်။

၎င်းတို့မှာ ရွေးကောက်ပွဲ၌ မဲရုံ တာဝန်ကျခဲ့ကြသူများဖြစ်ပြီး အများစုမှာ ကုသရေးစင်တာများမှ ပြန်ဆင်းသွားကြပြီဖြစ်ကာ ကျန်ရှိသူအနည်းငယ်တွင်လည်း ရောဂါ လက္ခဏာပြင်းထန်သူမရှိသလောက် နည်းပါးကြောင်း ၎င်းက ပြောသည်။

“ ပညာရေး ဝန်ထမ်းအများစုက အိမ်ပြန်ရောက်နေပြီ။ တချို့က (နိုဝင်ဘာ) ၁၁ ရက်လောက်က စတက်တယ်။ သူတို့ Symptom တွေစပြတာ ၃ ရက်ကနေ ၅ ရက်လောက်မှာ စပြ ကြတာများတယ်။ Fever Clinic ကိုစ ရောက်တယ်။ နောက် ကွာရန်တင်းစင်တာသွားတယ်ဆိုတော့ ဆေးရုံရောက်တဲ့ ရက်ကတော့ မျိုးစုံဖြစ်သွားတာပေါ့။ တချို့တွေဆိုရင် (နိုဝင်ဘာလ)၂၀ ဝန်းကျင်လောက်မှ ရောက်တဲ့သူတွေရှိတယ်။ အဲဒီလူတွေကလည်း ဆေးရုံမှာ ၁၁ ရက်နေဆိုရင် ဒီနေ့(ဒီဇင်ဘာ ၁ ရက်)လောက်တောင် ဆင်းပြီထင်တယ်။ အများစုကတော့ ကုန်ပါပြီ ” ဟု ဒေါက်တာ ဇော်မျိုးလှိုင်က ပြောသည်။

ကိုဗစ်- ၁၉ ရောဂါ ကူးစက်ခံရသည့် ပညာရေး ဝန်ထမ်းများကို MTF က တစ်ဉီးလျှင် ကျပ်ငါးသောင်းနှုန်းဖြင့် ထောက်ပံ့ပေးနေပြီး လတ်တလော ၁၄ ဉီးခန့် ပေးပို့ပြီးဖြစ်ကြောင်း သိရသည်။

“ ပထမပို့ပြီးတာက ၁၄ ယောက် လောက်ရှိတယ်။ ဒီနေ့ (ဒီဇင်ဘာ ၁ ရက်) ကျွန်တော်တို့ဆီက တစ်ယောက်ရဲ့အကူအညီနဲ့ ၃၆ ယောက် ထပ်ပို့ပြီ။ ၃၆ ယောက်က ပဲခူးထိ သွားပို့ပေးနေတယ်။ ကျန်တဲ့ မင်္ဂလာဒုံနဲ့ လှည်းကူးဘက်က ဆရာ၊ ဆရာမတွေကို ဝင်ပို့ပေးနေတယ်။ နောက်တစ်ခါ ပုသိမ်ဘက်ကို တစ်ယောက်က ခွဲပို့မယ်။ နောက်တစ်ယောက်က မန္တလေးဘက်ကို ခွဲပို့မယ်။ အဲလိုနဲ့စနေပြီ။ ကျွန်တော်တို့ နှစ်ရက်အတွင်းလောက် အပြီးပို့မှာပါ ” ဟု ဒေါက်တာ ဇော်မျိုးလှိုင်က ပြောသည်။

ပဲခူးတိုင်းရှိ ကိုဗစ် ၁၉ ကူးစက်ခံပညာရေးဝန်ထမ်းများကို လူကိုယ်တိုင် သွားရောက်ပေးပို့ခြင်းဖြစ်သော်လည်း အခြားဒေသများသို့ Wave Money ဖြင့် ပေးပို့ခြင်းဖြစ်သည်။

ထို့ပြင် သေဆုံးခဲ့သည့် ရန်ကုန်တိုင်း ဗိုလ်တထောင်နှင့် သန်လျင်မြို့နယ်တို့က ဆရာမနှစ်ဉီး၏ မိသားစုဝင်များနှင့် အဆက်အသွယ်ရထားပြီး MTF က မိသားစုဝင်များထံ အိမ်တိုင်ရာရောက်သွား၍ ကူညီထောက်ပံ့မှုများ လုပ်ဆောင်မည်ဖြစ်သော်လည်း လတ်တလော မအားလပ်သေး၍ မသွားနိုင်သေးကြောင်း သိရသည်။

“ သူတို့ကို သီးသန့်လှူထားတဲ့သူတွေ ရှိတယ်။ ဗိုလ်တထောင်က ဆရာမ ဆီသွားရမယ်။ သန်လျင်ကတော့ ဆုံးတာတော့ကြာပါပြီ။ ကျွန်တော်တို့ဘက်က အလုပ်မနိုင်သေးလို့မသွားနိုင်သေးတာပါ ” ဟု MTF ပြောခွင့်ရပုဂ္ဂိုလ်လည်းဖြစ်သည့် ဒေါက်တာ ဇော်မျိုးလှိုင်က ပြောသည်။

ယင်းဆရာမနှစ်ဉီးကို အလှူရှင်များက တစ်ဉီးလျှင် ကျပ်တစ်သိန်းခွဲစီ လှူဒါန်းထားသည့်အတွက် တစ်ဉီးလျှင် ကျပ်နှစ်သိန်းခန့် ထောက်ပံ့ရန် ရည်မှန်းထားကြောင်း သိရသည်။

Source - https://myanmar.mmtimes.com/news/147636.html