Modernaရဲ့ ကိုဗစ် ကာကွယ်ဆေးက ၂၅ ဒေါ်လာနဲ့ ၃၇ ဒေါ်လာကြား ဈေးနှုန်း သတ်မှတ်ဖွယ်ရှိနေ

 Modernaရဲ့ ကာကွယ်ဆေးက ၂၅ ဒေါ်လာနဲ့ ၃၇ ဒေါ်လာကြား ဈေးနှုန်း သတ်မှတ်ဖွယ်ရှိနေ

Moderna ကုမ္ပဏီက ထုတ်လုပ်တဲ့ ကာကွယ်ဆေးဟာ တစ်လုံးကို ၂၅ ဒေါ်လာနဲ့ ၃၇ ဒေါ်လာကြားလောက် ကျသင့်မယ်လို့ သိရပါတယ်။

Modernaရဲ့ ကာကွယ်ဆေး စမ်းသပ်မှု အစောပိုင်း ရလဒ်တွေကို ထုတ်ပြန်ထားရာမှာ ထိရောက်မှု အာနိသင် ၉၅ ရာခိုင်နှုန်းနီးပါး ရှိနေကြောင်း ကြေညာထားပါတယ်။ ဒီဆေးရဲ့ အားသာချက်က သာမန် အိမ်သုံး ရေခဲသေတ္တာတွေထဲမှာ တစ်လလောက်ကြာအောင် သိုလှောင်ထားနိုင်တယ် ဆိုတာပါ။ ဒါကြောင့် ကမ္ဘာအနှံ့ကို ဖြန့်ဖြူး တင်ပို့ဖို့ လွယ်ကူစေမယ်လို့ လေ့လာသူတွေက သုံးသပ်ထားပါတယ်။

ကာကွယ်ဆေးရဲ့ ဈေးနှုန်းနဲ့ ပတ်သက်လို့ ဂျာမန် မဂ္ဂဇင်း တစ်စောင်က မေးမြန်းရာမှာ Modernaရဲ့ အမှုဆောင်ချုပ် စတီဖိန် ဘန်ဆဲလ်က သူတို့ရဲ့ ဆေးဟာ ပုံမှန် တုပ်ကွေး ကာကွယ်ဆေးတွေလိုပဲ ၁၀ ဒေါ်လာနဲ့ ဒေါ်လာ ၅၀ ကြားလောက် ဈေးနှုန်း ကျသင့်လိမ့်မယ်လို့ ယေဘုယျဆန်ဆန် ဖြေကြားခဲ့ပါတယ်။ ဥရောပ သမဂ္ဂ တာဝန်ရှိသူ တစ်ဦးကတော့ Modernaနဲ့ ညှိနှိုင်းမှုတွေ ပြုလုပ်နေပြီး ရေရှည်မှာ ကာကွယ်ဆေး တစ်လုံးကို ၂၅ ဒေါ်လာအောက် ဈေးနှုန်းမျိုးနဲ့ တင်သွင်းနိုင်မယ်လို့ ယုံကြည်ထားကြောင်း ပြောပါတယ်။ Modernaရဲ့ ကာကွယ်ဆေး အပြည့်အဝ အာနိသင် ထက်မြက်ဖို့အတွက် လူတစ်ဦးကို ဆေးနှစ်လုံးထိုးဖို့ လိုပါတယ်။

လက်ရှိ အခြေအနေမှာတော့ ဥရောပ သမဂ္ဂနဲ့ Modernaတို့ကြားမှာ သဘောတူ စာချုပ်တစ်ရပ် ချုပ်ဆိုနိုင်တာမျိုး မရှိသေးပါဘူး။ ဒီကိစ္စဟာ ရက်ပိုင်းအတွင်း အထမြောက်လာမယ်လို့ ဘန်ဆဲလ်က မှတ်ချက် ပေးထားပါတယ်။ Modernaဟာ ကာကွယ်ဆေး စမ်းသပ်မှုနဲ့ ပတ်သက်တဲ့ ရလဒ်ကောင်းတွေကို တရားဝင် ထုတ်ပြန် ကြေညာတဲ့ ဒုတိယမြောက် ကုမ္ပဏီ ဖြစ်လာပါတယ်။ အဲဒီမတိုင်ခင်မှာ Pfizerကလည်း သူတို့ရဲ့ ကာကွယ်ဆေးက အာနိသင် ထက်မြက်မှု ၉၅ ရာခိုင်နှုန်း ဝန်းကျင်ရှိတယ်လို့ ထုတ်ပြန်ထားပါတယ်။

ကမ္ဘာတလွှားမှာ နောက်ဆုံးအဆင့် စမ်းသပ်မှုတွေ လုပ်ဆောင်နေတဲ့ Covid-19 ကာကွယ်ဆေး အမျိုးအစား တစ်ဒါဇင်လောက် ရှိနေပြီး လာမယ့် လပိုင်းအတွင်း ကာကွယ်ဆေး အသစ်တွေ ဆက်တိုက် ပေါ်လာမယ်လို့ ကမ္ဘာ့ကျန်းမာရေး အဖွဲ့ကြီး (WHO)က ခန့်မှန်းထားပါတယ်။

Source - 7days TV