မြန်မာနိုင်ငံ၏ COVID-19 ထိန်းချုပ်ရေးအတွက် ကမ္ဘာ့ရန်ပုံငွေအဖွဲ့က ဒေါ်လာခုနစ်သန်း ပေးအပ်ထားပြီး ထပ်မံ၍ ဒေါ်လာ ၁၈ သန်းပေးရန် ခွင့်ပြု

 မြန်မာနိုင်ငံ၏ COVID-19 ထိန်းချုပ်ရေးအတွက် ကမ္ဘာ့ရန်ပုံငွေအဖွဲ့က အမေရိကန်ဒေါ်လာ ခုနစ်သန်း ပေးအပ်ခဲ့ပြီး ထပ်မံ၍ အမေရိကန်ဒေါ်လာ ၁၈ သန်း ပေးရန် ခွင့်ပြုထားကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

မြန်မာနိုင်ငံ၏ COVID-19 ကာကွယ် ထိန်းချုပ်ရေး လုပ်ငန်းများတွင် အသုံးပြုရန် ကိုရီးယားနိုင်ငံမှ ASEAN – KOREA Cooperation Fund ဖြင့် COVID-19 Antigen Test Kits ၄၀၀၀၀ ကျော် လှူဒါန်းခဲ့သည်။

နိုဝင်ဘာ ၁၆ ရက်က နေပြည်တော်၌ မြန်မာနိုင်ငံ၏ COVID-19 ကာကွယ် ထိန်းချုပ်ရေး လုပ်ငန်းများတွင် အသုံးပြုရန် ကိုရီးယားနိုင်ငံမှ ASEAN – KOREA Cooperation Fund ဖြင့် COVID-19 Antigen Test Kits များ လှူဒါန်းပေးအပ်မှု အခမ်းအနား ပြုလုပ်ခဲ့ကြောင်း၊ မြန်မာနိုင်ငံ၏ COVID-19 ကာကွယ်ထိန်းချုပ်ရေး လုပ်ငန်းများတွင် အသုံးပြုရန်အတွက် ဓာတ်ခွဲစက်ပစ္စည်း ကိရိယာများ၊ ဓာတ်ခွဲဆက်စပ်ပစ္စည်းများ၊ Rapid Antigen Diagnostic Test Kits များ၊ တစ်ကိုယ်ရည်သုံး ရောဂါကာကွယ်ရေး အသုံးအဆောင်များကို ကိုရီးယားနိုင်ငံမှ ပေးအပ်လှူဒါန်းလျက်ရှိရာ လက်ရှိအချိန်အထိ ကိုရီးယားနိုင်ငံအစိုးရမှ လှူဒါန်းမှု တန်ဖိုး အမေရိကန်ဒေါ်လာ သုံးသန်းခန့်ရှိ ပြီဖြစ်သည်။

COVID-19 သည် မျိုးရိုးဗီဇ ပြောင်းလဲလာနိုင်ခြင်း အပါအဝင် အသက်ရှူလမ်းကြောင်းမှတစ်ဆင့် လျင်မြန်စွာ ကူးစက်သည့်ရောဂါ ဖြစ်ခြင်းကြောင့် ပြည်သူများက ရောဂါကာကွယ်ရေး နည်းလမ်းများကို မဖြစ်မနေ ဆက်လက်လိုက်နာရန် ကျန်းမာရေးနှင့် အားကစားဝန်ကြီးဌာနက အသိပေး နှိုးဆော်ထားသည်။

မြန်မာနိုင်ငံတွင် COVID-19 ကူးစက်မှု ဒုတိယလှိုင်းနောက်တွင်လည်း ကူးစက်မှု လှိုင်းငယ်များ ရှိလာနိုင်ပြီး ကူးစက်မှုလှိုင်းများ မကြီးမားစေရန်နှင့် ၎င်းလှိုင်းများ တစ်ခုနှင့် တစ်ခုအကြား အချိန်ကွာခြားမှုကြာမြင့် စေရန်အတွက် COVID-19 ကာကွယ်ရေး စည်းကမ်းများကို အလေးထား လိုက်နာကြရန် လိုအပ်ကြောင်း၊ စွမ်းရည်ထက်မြက်သည့် COVID-19 ကာကွယ်ဆေး ပေါ်ပေါက်ပြီး နောက်ပိုင်းတွင်လည်း တစ်နိုင်ငံလုံး အတိုင်းအတာနှင့် ထိုးနှံရန်မှာ ကာကွယ်ဆေးရရှိမှု ပမာဏအပေါ် မူတည်၍ အချိန်ကြာမြင့်နိုင်မည်ဖြစ်ခြင်း၊ ရောဂါပိုး၏ မျိုးဗီဇ ပြောင်းလဲလာနိုင်ခြင်း၊ ရောဂါလက္ခဏာ မပြဘဲ ရောဂါရှိနေနိုင်ခြင်း၊ အသက်ရှူ လမ်းကြောင်းမှတစ်ဆင့် လျင်မြန်စွာ ကူးစက်သည့်ရောဂါ ဖြစ်ခြင်း စသည့်အချက်များကြောင့် ပြည်သူများ အနေဖြင့် ယခုကျင့်သုံးလျက်ရှိသည့် COVID-19 ရောဂါ ကာကွယ် ထိန်းချုပ်ရေး နည်းလမ်းများကို မဖြစ်မနေ ဆက်လက်လိုက်နာ ဆောင်ရွက်သွားရန် လိုအပ်ကြောင်း ကျန်းမာရေးနှင့် အားကစားဝန်ကြီးဌာနက အသိပေး နှိုးဆော်ထားသည်။

မြန်မာနိုင်ငံတွင် COVID-19 ဖြစ်ပွားမှုနှင့် သေဆုံးမှု အနည်းဆုံးဖြစ်စေရန် ကာကွယ်ကုသ ထိန်းချုပ်ရေး လုပ်ငန်းများကို အားထုတ်ဆောင်ရွက်လျက်ရှိပြီး ပြည်သူတစ်ဦးချင်းစီမှလည်း တာဝန်သိစွာဖြင့် ပူးပေါင်းပါဝင် ဆောင်ရွက်ကြရန် ကျန်းမာရေးနှင့် အားကစားဝန်ကြီးဌာနက တိုက်တွန်းနှိုးဆော်ထားသည်။

COVID-19 ကပ်ရောဂါသည် ကမ္ဘာ့နိုင်ငံ အနှံ့အပြားတွင် ကူးစက်ဖြစ်ပွားမှုနှင့် သေဆုံးမှု ဆက်လက် မြင့်မားနေဆဲ ဖြစ်ကြောင်း၊ ကျန်းမာရေးနှင့် အားကစားဝန်ကြီးဌာနရှိ ပြည်သူ့ကျန်းမာရေးကဏ္ဍနှင့် ကုသရေးကဏ္ဍတို့မှ တာဝန်ရှိသူ အသီးသီးသည် မြန်မာနိုင်ငံတွင် COVID-19 ဖြစ်ပွားမှုနှင့် သေဆုံးမှု အနည်းဆုံး ဖြစ်စေရန် COVID-19 ကာကွယ်ကုသ ထိန်းချုပ်ရေး လုပ်ငန်းများကို အားထုတ်ဆောင်ရွက် လျက်ရှိပြီး ပြည်သူတစ်ဦးချင်းစီမှလည်း တာဝန်သိစွာဖြင့် ပူးပေါင်းပါဝင် ဆောင်ရွက်ကြရန်နှင့် COVID-19 ကူးစက်ဖြစ်ပွားမှုနှင့် သေဆုံးမှု ကိန်းဂဏန်းများကို များခြင်း၊ နည်းခြင်း၊ ကောင်းခြင်း၊ ဆိုးခြင်းတို့ကို ကောက်ချက်ချခြင်း၊ မှတ်ချက်ပြုခြင်း ပြုလုပ်မည် ဆိုပါက ရှုထောင့်ပေါင်းစုံ၊ နည်းလမ်းမျိုးစုံဖြင့် လေ့လာဆန်းစစ် သုံးသပ်ပြီးမှသာလျှင် အခြေအနေကို မှန်ကန်စွာ အကဲဖြတ် သိရှိနိုင်မည်ဖြစ်ကြောင်း ဖော်ပြထားသည်။

ရန်ကုန်တိုင်းဒေသကြီးအတွင်း COVID-19 ကုသရေးဆေးရုံကြီး ငါးခု၊ ကုသရေးစင်တာ ၁၅ ခုတွင် ခုတင် စုစုပေါင်း ၁၀၀၀၀ ကျော်ရှိပြီး ICU ခုတင် ၁၄၀ ကျော်နှင့် အောက်ဆီဂျင်ပေးနိုင်သည့် ခုတင် ၁၀၀၀ ခန့် ရှိကြောင်း သိရသည်။

Source -  https://news-eleven.com/article/198211