မင်းတည်ကွင်း မြေယာပေါ် နေထိုင်သူများ အင်အားသုံး ဖယ်ရှားခံရ

 မင်းတည်ကွင်း မြေယာပေါ် နေထိုင်သူများ အင်အားသုံး ဖယ်ရှားခံရ

ဧရာဝတီ၊ နိုဝင်ဘာ ၂၆၊ ၂၀၂၀

မန္တလေးတိုင်းဒေသကြီး ပုသိမ်ကြီးမြို့နယ် ကျွဲနဖားကျေးရွာကွင်း နှင့် ပြင်ဦးလွင်မြို့နယ်ကြား လွန်ကောင်းကျေးရွာအုပ်စု ဝါးနက်ကျေးရွာ မင်းတည်ကွင်း ယာမြေတွင် နေထိုင်ကြသည့် ဒေသခံတောင်သူများကို လုံခြုံရေး တပ်ဖွဲ့များက ယနေ့မနက်ပိုင်းတွင် အင်အားသုံး ဖယ်ရှားခဲ့ကြောင်းသိရသည်။ 

အဆိုပါဒေသခံများနှင့် အမှတ် ၁၂၁ ထောက်ပံ့နှင့် ပို့ဆောင်ရေးတပ်ရင်းတို့ကြား မြေယာအငြင်းပွားမှုဖြစ်ပွားကာ တရားရင်ဆိုင်နေကြသည့် ထိုမြေပေါ်တွင် နေထိုင်လျှက်ရှိသည့် နေအိမ်များကို ယနေ့နံနက် ၄ နာရီခန့် က ၁၂၁ တပ်မှ ဝင်ရောက်ဖျက်စီးကာ ခြံစည်းရိုးကာရံသဖြင့် ရုန်းရင်းဆန်ခတ်ဖြစ်ပေါ်ခဲ့ကြောင်းသိရသည်။

၂၀၁၉ ခုနှစ် ဧပြီလ ၃၀ ရက်နေ့က အဆိုပါ အငြင်းပွားမှုဖြစ်ပေါ်နေသည့် မြေယာပေါ်တွင် အမှတ် ၁၂၁ ထောက်ပံ့၊ ပို့ဆောင်ရေးတပ်ရင်းက နို့စားနွားမွေးမြူရေး စီမံကိန်း ဧရိယာအဖြစ် နယ်နမိတ်သတ်မှတ်ကာ ၁၇၃ ဧကကို ခြံစည်းရိုးလာရောက်ခတ်ခဲ့သည့်အတွက် ဒေသခံတောင်သူများနှင့် ပထမအကြိမ် ရုန်းရင်းဆန်ခတ်ဖြစ်ပွားခဲ့ပြီး ပြင်ဦးလွင်မြို့နယ် တရားရုံးတွင် မြေယာပိုင်ဆိုင်မှုကို နှစ်ဘက် ဖြေရှင်းနေဆဲဖြစ်ကြောင်းလည်း သိရသည်။

 ယခုကဲ့သို့ စီမံကိန်း ဧရိယာအဖြစ် မည်သည့်အထောက်အထားမှ မပါရှိဘဲလာရောက် သိမ်းဆည်းခြင်းကို လက်မခံနိုင်ကြောင်းနှင့် မြေယာလျော်ကြေးပေးထားသည်မှာလည်း မဟုတ်မှန်ကြောင်း၊ ၎င်းတို့စီမံကိန်းမြေသည် ၁၆ မိုင်ဂိတ် မြောက်ဘက်တွင်သာ သက်ဆိုင်ကြောင်း ဒေသခံတောင်သူများက ပြောသည်။

ထို့အပြင် ၎င်းတို့သည် ၁၉၇၂ ခုနှစ်ကတည်း ဓါးမဦးချနေထိုင်လာကြသည့်တောင်သူများဖြစ်ပြီး ယခုမြေယာများသည် သူတို့ပိုင်ဆိုင်ကြောင်း မြေခွန်ရေခွန်များနှင့် ပိုင်ဆိုင်မှုများကိုင်ဆောင်ကာ ကန့်ကွက်နေကြသည်။

သတင်းနှင့် ဓာတ်ပုံ - ဇော်ဇော်၊ ဧရာဝတီ

#IRWLaborRights

#အလုပ်သမားအခွင့်အရေး