မကွေးတိုင်းဒေသကြီးတွင် ကိုဗစ်လူနာ (၅၂) ဦး ထပ်တိုးတွေ့ရှိ၍ ပိုးတွေ့လူနာ ပေါင်း (၁၂၂၅) ဦးထိရှိလာ

 မကွေးတိုင်းဒေသကြီးတွင် ကိုဗစ်-၁၉ ပိုးတွေ့အတည်ပြုလူနာ(၅၂)ဦး ထပ်တိုးတွေ့ရှိလာခဲ့ပြီး ပိုးတွေ့လူနာပေါင်း (၁၂၂၅) ဦးထိ ရှိလာပြီဖြစ်ကြောင်း မကွေးတိုင်းဒေသကြီး ပြည်သူ့ ကျန်းမာရေးနှင့် ကုသရေးဦးစီးဌာနက နိုဝင်ဘာလ ၂၄ ရက် ယနေ့နံနက် ၇ နာရီအချိန် ထုတ်ပြန်ချက်အရ သိရသည်။

ဒီကနေ့မနက် (NHL results)အရ ပိုးတွေ့လူနာ(၅၀)ဦးနဲ့(RDT results)၂ ဦးတို့ ထပ်တိုး တွေ့ရှိတာပါ၊ ပိုးတွေ့တဲ့ မြို့နယ်တွေက အောင်လံက(၂၅)ဦး၊ စလင်း(၈)ဦး၊ တောင်တွင်း ကြီး(၅)ဦး၊ ပခုက္ကူ(၄)ဦး၊ ရေနံချောင်း(၄) ဦး၊ ဆိပ်ဖြူ(၂)ဦး၊ မြို့သစ်(၂)ဦး၊ ပွင့်ဖြူ(၁)ဦးနဲ့ ဂန့်ဂေါက(၁)ဦး တို့ဖြစ်ပါတယ်၊ ပိုးတွေ့လူနာတွေထဲက အောင်လံ(၁၃)ဦးက ပိုးတွေ့ အတည်ပြု လူနာနှင့် ထိတွေ့မှု ရှိတဲ့သူတွေဖြစ်ပြီး အသွားအလာ ကန့်သတ် ထားသူတွေပါ၊ ကျန်သူတွေက ရန်ကုန်ပြန်၊ ကျုံပျော်ပြန် (Quarantine Centre)တွေက ဖြစ်ပါတယ်၊ ယနေ့အထိ မကွေးတိုင်းဒေသကြီးအတွင်းမှာ ကိုဗစ်-၁၉ ပိုးတွေ့အတည်ပြုလူနာ စုစုပေါင်း(၁၂၂၅)ဦး ရှိပြီး၊ နိုဝင်ဘာ ၂၃ ရက်နေ့မှာ ပွင့်ဖြူမြို့နယ် ကျောင်းတော်ရာကျေးရွာက အသက် ၅၄ နှစ်အရွယ် အမျိုးသမီးတစ်ဦးမှာ လေဖြတ်ဖူးသူဖြစ်ပြီး ကိုဗစ်ပိုးတွေ့ပြီးနောက် အခြားရောဂါအခံတ ွေကြောင့် သေဆုံးခဲ့တဲ့အတွက် တိုင်းဒေသကြီးအတွင်း ကိုဗစ်-၁၉ ရောဂါကြောင့် သေဆုံးသူ(၃)ဦးရှိပြီ ဖြစ်တယ် လို့ တိုင်းဒေသကြီး ပြည်သူ့ကျန်းမာရေးနှင့် ကုသရေးဦးစီးဌာန လက်ထောက်ညွှန်ကြား ရေးမှူး ဒေါက်တာ ခင်မောင်သန်းက အတည်ပြု ပြောကြားသည်။

ယခုအခါ မကွေးတိုင်းဒေသကြီးရှိ မြို့နယ်အားလုံးဖြစ်သည့်(၂၅)မြို့နယ်တွင် ကိုဗစ်ကူးစက်မှု ရှိနေပြီး၊မကွေးတိုင်း ဒေသကြီးအတွင်း ယခုအချိန်ထိ ကိုဗစ်-၁၉ ပိုးတွေ့လူနာစုစုပေါင်း (၁၂၂၅) ဦးထိ ရှိ‌နေပြီဖြစ်ကာ၊ တိုင်းဒေသကြီးက ဆေးရုံအသီးသီးမှာ ဆေးရုံတက်ရောက်ဆဲ (၃၃၀) ဦးရှိပြီး ကျန်းမာရေး ကောင်းမွန်၍ ဆေးရုံဆင်းခွင့်ရရှိသူ(၈၉၂)ဦးနှင့် သေဆုံးသူ(၃)ဦး ရှိကြောင်း တိုင်းဒေသကြီး ပြည်သူ့ ကျန်းမာရေးနှင့်ကုသရေးဦးစီးဌာန မှတ်တမ်းများအရ သိရသည်။

သန်းနိုင်ဦး(ငဖဲ)