လူရွေးပွဲ----------------------------------
မင်းခိုက်စိုးစန်
(၁)
ချစ်သော ဒီနိုင်ငံ ကနေ အပြီးတိုင်ထွက်ခွာဖို့
ခက်ခက်ခဲခဲ ဆုံးဖြတ်လိုက်ရတဲ့ တစ်ညနေ ပါ ...၊
အဲဒီ ညနေမှာပဲ ...
သရုပ်ဆောင် ရွေးပွဲ ဖိတ်စာ တစ်စောင်ဟာ
ငါ့ နာမည် ကို ကျယ်ကျယ်လောင်လောင် အော်ခေါ်ရင်း
ရောက်လာခဲ့ ...။
(၂)
' လူရွေးပွဲ ' ... တဲ့ ၊
တစ်ယောက်တည်း အရွေးခံရမယ့် ပွဲမှာ
ကျန်တဲ့သူတွေ အားလုံး အသည်းကွဲရမယ် ...၊
(၃)
အဲဒီလို လူသတ်ကွင်းဆန်ဆန် သဘာ၀
မူလတန်း ကတည်းက သိတယ် ...၊
ဆရာမ ခြင်းတောင်းကို ပြေးသယ်ချင် သယ်
နောက်ဆုံး ခုံတန်းကို ရွေးချယ်ချင် ချယ် ..၊
သူငယ်တန်းမှာ ပထမ ရရုံနဲ့လည်း
အရွယ်ရောက်တဲ့ အခါ
သိပ် အသုံးမကျ လှ ပါဘူး ...။
(၄)
အရူးတွေလည်း တစ်ခါတစ်ရံ
ရွေးချယ်ခံရနိုင်ကြောင်း
သတင်းကောင်း ကြားခဲ့တယ် ...၊
(၅)
လူရွေးပွဲ မှာ ...
'မင်း ဘာလဲ ...' ဆိုတာကို မစစ်ဆေးပါဘူး ၊
'ငါတို့ လိုချင်တာ...' ကိုပဲ
အမှတ် (၁၀၀)ဖိုး မေးထားတယ် ...၊
(၆)
ငါတို့တွေဟာ တခါတလေ အမဲလိုက်ကြ ...
ငါတို့တွေဟာ တခါတလေ အမဲလိုက်ခံကြရ ...
လူရွေးပွဲ ကျင်းပခြင်းကိုက
ဟောဒီကမ္ဘာရဲ့ ယဉ်ကျေးမှု ပဲ ...။
(၇)
တစ်ပဲခြောက်ပြားပေးမယ့် အလုပ်ရှင်ကလည်း
လူရွေးပွဲ ကျင်းပတယ် ...၊
တစ်သက်လုံး သစ္စာရှိမယ်လို့ ပြောတဲ့ ချစ်သူကလည်း
လူရွေးပွဲ ကျင်းပတယ်... ၊
ခွင့်တူညီမျှ ဝါဒဖြူစင်တဲ့ နိုင်ငံတော်ကလည်း
လူရွေးပွဲ ကျင်းပတယ်... ၊
(၈)
ကိုယ်ချစ်တဲ့သူက ရွေးချယ်တာကို မခံရလည်း
၀မ်းမနည်းပါနဲ့ ...၊
သူက မင်းကို မရရှိလိုက်တာလည်း ဖြစ်နိုင်တယ်။
ဒီ နိုင်ငံက ရွေးချယ်တာကို မခံရလည်း
၀မ်းမနည်းပါနဲ့... ၊
ဒီ နိုင်ငံက မင်းကို မရရှိလိုက်တာလည်း ဖြစ်နိုင်တယ်။
(၉)
ဟောဒီမယ် ...
နေရာသစ်ဆီသွားဖို့ လေယာဉ်လက်မှတ် ...၊
ငါ ဓားပေါက်ခံနေရတဲ့ ဆပ်ကပ် နဲ့
သေခန်းပြတ်ဖို့ လိုအပ်ပြီ ...။
(၁၀)
လူရွေးပွဲ အပြီး နောက်နေ့မနက်
ရွှေတိဂုံ စေတီတော်ကို
နောက်ဆုံးအကြိမ် ဖူးမြော်ဖို့
ငါ ... တက်ခဲ့ ။
စပယ်ပွင့်ဖြူဖြူတွေ ပူဇော်ထားတဲ့ပုံ
ရနံ့တွေ စိတ်ကောင်းရှိလွန်းတာ
ငါ ... အတိုင်းသား မြင်ရ ။
(၁၁)
အဲဒီ ညနေမှာပဲ...
မိတ်ဆွေတစ်ယောက်ရဲ့ ဈာပန
ရေဝေးမှာ ကျင်းပတယ် ၊
အသုဘအလောင်းရဲ့ ရင်ခွင်ပေါ်မှာ
စပယ်တွေဟာ ဖွေးဖွေးကျဲပက်
ရနံ့ကလည်း တာ၀န်မပျက် မွှေးလို့ ...။
(၁၂)
ဘုရားရင်ပြင်ပေါ်၊ အလောင်းစင်ပေါ်...၊
စံပယ်ပွင့် တွေက သူ့ကို ရွေးချယ်မှုအပေါ် မတုန်လှုပ်တဲ့ပုံ
ငါ့ အရှက်ကို မလုံမခြုံ ဖြစ်စေရော ...။
(၁၃)
ခေတ်ကြီးက ရေနွေးဆူသလို ဆူတယ်
ငါက ဘာဖြစ်လို့ စံပယ်ဖြူသလို မဖြူနိုင်ရမှာလဲ ...
(၁၄)
လေယာဉ်လက်မှတ်ကို ငါ ဆုတ်ဖြဲလိုက်တယ် ...၊
ဒီ နိုင်ငံက ငြင်းပယ်လည်း
ဒီ နိုင်ငံကိုပဲ ဆက်ချစ်မယ် ...
ငါ့ရင်ထဲ စံပယ်တွေ တစ်ခင်းလုံးပွင့်မှတော့
ပေါက်ဓားတွေ အစင်းစင်း စိုက်လည်း
လှတယ် .....။
(မင်းခိုက်စိုးစန်)
၂၀၁၉
Comments
Post a Comment