ကိုဗစ်ကာကွယ်ဆေး နိုင်ငံတိုင်းမျှမျှတတဖြန့်ချိပေးရန်နှင့် အဆင်းရဲဆုံးနိုင်ငံများကို ကူညီရန် ဂျီ-၂၀ ခေါင်းဆောင်များ ကတိပြု

 ဘေဂျင်း၊ နိုဝင်ဘာ ၂၂

စီးပွားရေးအင်အားကြီးနိုင်ငံ ၂၀ မှ ခေါင်းဆောင်များသည် ကိုရိုနာဗိုင်းရပ်စ်နှင့် ပတ်သက်သော ကာကွယ်ဆေးများ၊ဆေးဝါးများကို ကမ္ဘာတစ်ဝန်း မျှမျှတတဖြန့်ဝေပေးရေးနှင့် Covid-19 ရိုက်ခတ်မှုဒဏ်မှ နာလန်ပြန်ထူရန်ရုန်းကန်နေရသည့် ဆင်းရဲသောနိုင်ငံများအတွက် လိုအပ်သည်များကို အထောက်အပံ့ပေးနိုင်ရေးတို့ကို လုပ်ဆောင်သွားမည်ဖြစ်ကြောင်း နိုဝင်ဘာလ ၂၁ ရက်နေ့တွင် ကတိပြုခဲ့သည်ဟု CNA သတင်းဌာနတွင် ဖော်ပြသည်။

“တီထွင်ဆန်းသစ်မှုတွေကို မက်လုံးပေး စွဲဆောင်ဖို့ အဖွဲ့ဝင်နိုင်ငံတွေရဲ့ သန္နိဋ္ဌာန်နဲ့အညီ လူတိုင်းအတွက် တန်းတူညီမျှဖြစ်ပြီး တတ်နိုင်တဲ့ဈေးနှုန်းနဲ့ ဝယ်ယူရရှိနိင်ဖို့ ကျွန်တော်တို့ ကြိုးစားသွားမှာပါ”ဟု ဂျီ-၂၀ ကြေညာထုတ်ပြန်ချက်မူကြမ်းတွင် နိုင်ငံခေါင်းဆောင်များက ရေးသားထားသည်။

အလှည့်ကျဥက္ကဋ္ဌ ဆော်ဒီအာရေဗျ နိုင်ငံဦးဆောင်ကာ နှစ်ရက်တာ ကျင်းပသည့် ဂျီ-၂၀ ညီလာခံ ပထမတစ်ရက်တွင် ကိုရိုနာဗိုင်းရပ်စ် ကပ်ဘေးအပြင် ယင်းနှင့်အတူဒွန်တွဲနေသည့် ကမ္ဘာတစ်ဝန်းနိုင်ငံများ ပြန်လည်နာလန်ထူနိုင်ရေးကိစ္စများသာ အများဆုံးဆွေးနွေးခဲ့ကြသည်။ လာမည့်လတွင် အီတလီက အလှည့်ကျ ဥက္ကဋ္ဌနေရာ ဆက်ခံရမည်ဖြစ်သည်။

ယခုနှစ်တွင် ကမ္ဘာတစ်ဝန်းနိုင်ငံများ၏ စီးပွားရေးလုပ်ငန်းများ Covid-19 ကြောင့် တစ်နှစ်လုံးနီးပါး ရပ်တန့်ခဲ့ရပြီး ၂၀၂၁ ခုနှစ်တွင် စီးပွားရေးလုပ်ငန်းများ ပြန်လည်နာလန်ထူနိုင်ရန် ကြိုးစားအားထုတ်မှုများ လိုအပ်နေသည်မှာ အဓိကပင်ဖြစ်သည်။

“ကျွန်တော်တို့ လူတိုင်းအတွက် အဲ့ဒီကာကွယ်ဆေးနဲ့ ပတ်သက်တဲ့ပစ္စည်း ဆေးဝါးတွေကို တတ်နိုင်တဲ့နှုန်းထားနဲ့ ညီညီမျှမျှဖြစ်အောင် လုပ်ဆောင်ပေးရပါမယ်”ဟု ဆော်ဒီအာရေးဗျဘုရင် ဆယ်လ်မန်ဘင်အက်ဘ်ဒူလာဇစ်က အဖွင့်အမှာ စကားတွင် ပြောကြားခဲ့သည်။

ကိုရိုနာဗိုင်းရပ်စ် ကပ်ဘေးကြီးကြောင့် ကမ္ဘာတစ်ဝန်းချမ်းသာသောနိုင်ငံနှင့် ဆင်းရဲသောနိုင်ငံများအကြား ခွဲခြားဆက်ဆံမှုများ အလွန်ဆိုးရွားလာနိုင်ကြောင်းကို ဂျီ-၂၀ အဖွဲ့ဝင်နိုင်ငံခေါင်းဆောင်များက စိုးရိမ်လျက်ရှိသည်ဟုဖော်ပြခဲ့ကြသည်။

"လူချမ်းသာတွေကပဲ ဗိုင်းရပ်စ်ကို ကာကွယ်နိုင်ပြီး ပုံမှန်ဘဝပြန်စနိုင်တဲ့ အမြန်နှုန်းနှစ်မျိုးဖြစ်နေတဲ့ ကမ္ဘာမျိုးကနေ ရှောင်လွှဲနိုင်ဖို့ အစွမ်းကုန်ကြိုးစားရပါမယ်" ဟု ပြင်သစ်သမ္မတ အီမန်နျူရယ်မက်ခရွန် ကပြောကြားခဲ့သည်။

Source - http://thevoicemyanmar.com/news/44629-sin